By: janicejc & eyolayvar
ANG DIOS ESPIRITU!
Samtang siya nakig sulti ngadto sa usa ka babayeng Samaritanhon, diha duol sa atabay nga gikalot ni Jacob, si Ginoong Jesus misulti sa usa ka importante kaayo nga kamatuoran, nga ang Dios Espiritu. ( John 4:24 ).
Kini nga kamatuoran angay nato nga masabtan, tungod kay kini mao ang pondasyon sa mesahe sa Gingharian sa Dios.
Ang pulong “ESPIRITU”, diha sa Old Testament sa Balaang Kasulatan, nag gikan sa pinulongan nga Hebrohanon “Ruwach” ug sa New Testament sa pinulongan nga Grego “Pneuma” nga nagkahulogan ug “Breath, Air or Life Energy” (Gininhawa, Hangin o Energia sa Kinabuhi).
Ang Dios isip ESPIRITU wala mag kahulogan nga kini usa ka personahe. Kon dili kini nagpasabot nga ang Iyang pagka-ESPIRITU usa ka KINAIYA o CHARACTER sa Iyang pagka-Dios. Isip ESPIRITU ang Dios mao ang ENERGIA nga naghatag ug kinabuhi sa lawas, ingon nga kini maka lihok. Siya usab ang ENERGIA sa atong KALAG “Soul” diin maka operar ang atong Huna-huna “Mind”, Kabubut-on “Will” ug Emosyon “Emotion”.
Sa Genesis 2:7, nag-umol ang Ginoong Dios sa lawas sa tawo. Apan nabuhi lamang kini sa diha nga gihuyop niya ang Iyang gininhawa o “ESPIRITU”. Isip usa sa Dios diha sa ESPIRITU, ikaw ug ako igsoon, kabahin niini nga “GININHAWA SA DIOS”.
Sa samang pa-agi diha sa Psalmo 139 atong mabasa ang pag-umol sa Dios sa lawas sa tawo diha sa tagu-angkan sa inahan. Apan sumala sa mga pagtuon sa science, ang bata nga anaa sa sabakan sa inahan, makabaton ug kinabuhi lamang sa diha nga aduna nay gitawag ug “quickening”. Ang quickening mao ang punto diin ang bata nakabaton ug kinabuhi.
Kon kita adunay mata nga makakita, ug dunggan nga maka dungog, atong masabot nga ang naghatag kinabuhi sa tawo mao ang ESPIRITU sa Dios. Ug isip kabahin sa Gininhawa sa Dios, isip ESPIRITU, ikaw ug ako kini igsoon ang gihuyop sa Dios ngadto sa gi umol nato nga lawas diha sulod sa sabakan sa atong inahan. Busa ang tawo diay, dili lawas nga naay espiritu, apan ESPIRITU nga anaay lawas. Nahitabo lamang nga ang lawas mo lihok, ug ang mga parte niini tungod kay anaa paman ang ESPIRITU sa Dios nagpuyo niini, ug kana nga ESPIRITU kabahin sa Gininhawa sa Dios nga mao ako ug ikaw. “Ang espiritu sa Dios nag-buhat kanako ug ang hininhawa sa Labing Gamhanan maoy naghatag kanako ug kinabuhi”. (Job 33:4).
Diha sa sinulat ni propeta Ezekiel sa “Valley of Dry Bones” atong mabasa nga ang mga bukog samtang siya nagpropesiya, nahimung usa, apan kini walay kinabuhi. Busa ang Dios sa Exekiel 37:5 ni ingon: “Himuon ko nga ang gininhawa mo sulod kanimo ug ikaw makabaton ug kinabuhi”.
Sa samang pa-agi igsoon, ang atong Kristohanon kinabuhi sama sa mga bukog nga patay ug walay kinabuhi, hangtud atong madawat ang trumpeta sa mensahe nga nagdala sa pagpadayag sa Dios nga kita ESPIRITU ug kabahin sa Gininhawa sa Dios. Isip kabahin sa ESPIRITU sa Dios, kita ang nagdala sa Kinabuhi sa Dios niini atong lawas. Hinungdan nga kon kini atong biyaan, kini mamatay ug mawad-an na sa kinabuhi.
Daghan sa katawhan karun dinhi sa kalibutan, nagpuyo sa sayop nga huna-huna nga ang kinabuhi anaa sa lawas. Busa sila mo ingon, nga ako masakiton, ug aduna ako niini nga sakit o kasakit sa kinabuhi. Dili ba sukwahi kini sa gipadayag kanato sa Dios nga kita usa Kaniya diha sa Espiritu ug kabahin sa Iyang Gininhawa.
Ang pangutana nga atong hinuktukan mao nga: MASAKIT ba diay ang Espiritu sa Dios. Makabaton ba diay ug Sakit o Kasakit ang Gininhawa sa Labaw nga Makagagahum. DILI igsoon. Dinhi kita makapangutana ngano man diay nga ang tawo NAGKASAKIT man? Anaa gayud kamatuoran nga ang tawo wala maka-amgo. Ug kini mao ang kamatuoran sa iyang pagka-usa sa Dios isip ESPIRITU. Eternal, Imortal ug Dili Makita.
Ang kausaban sa atong kinabuhi manukad sa kausaban sa atong mga panghuna-huna. Ang tawo sa diha nga nahimulag sa Dios pina-agi sa iyang pagsupak sa dili pagkaon sa bunga sa Kahoy sa Kahibalo sa Maayo ug Dautan, siya gipagawas sa Eden, ug dinhi unang na amgohan ug natagamtaman sa tawo ang kalisud sa pagkinabuhi. Diha sa gawas sa Eden usab natawo si Cain nga mipatay sa iyang kaugalingon nga igsoon nga si Abel.
Ang pagkahimulag sa tawo sa Dios mao ang pinakauyokan nga hinungdan ngano ang tawo masakit ug maka matagamtam ug kasakit. Pamalandongi kini igsoon ug dad-a sa lawom nga pagtukaw diha sa Dios, ug ang kahayag sa himaya sa kahibalo sa Dios magalamdag kanimo.
– Pagasumpayan Pa –
January 16, 2017 (Toledo City, Cebu Philippines)
Leave a Reply