| By: Janice J.C. and E.R.Y. Olayvar
(An Adaptation from the booklet: “Created to Manifest Christ” by DES WALTER)
|
“ Ug miingon ang Dios,“Buhaton nato ang tawo sumala sa atong dagway, ingon nga sama kanato, ug magmando sila sa mga isda sa dagat, ug mga langgam sa kalangitan, ug sa mga kahayopan, ug sa tibuok nga yuta, ug sa tanan nga nagkamang sa ibabaw sa yuta.Sa Genesis 1:26-27, atong mabasa nga gibuhat sa Dios ang “TAWO” sumala sa iyang “DAGWAY” ug “INGON SAMA” gayud Kaniya.
Kini igsoon, yano lamang kon basahon, apan alang sa kadaghanan sa mga tawo magtutuo man o dili, ang Genesis 1:26-27, nagpabilin nga usa ka tanghaga ug misteryo. Bisan pa man gani sa mga ma-alamon sa kalibutanong kahibalo ug kanila nga naga-angkon nga nakaila sila sa Dios, wala makahubad ug makasabot sa lintonganay gayud nga kahulugan niini.
Igsoon, diha sa Dios ma-anaa ang mga tinagung butang (Romans 16:25) nga gitagu-an sukad pa sa pagtukod sa kalibutan. Ug kini gitagu-an diha kang Kristo. Ang Deuteronomy 29:29 nagsulti nga ang mga tinagung butang iya sa Dios, apan kini mamahimo nga atoa kon kini igapadayag na ngari kanato.
Sa dili pa nato sugdan paghubad ang Genesis 1:26-27, pina-agi sa grasya sa Dios nga atong Amahan, arun kita makabaton ug pagsabot niini nga mga bulawanong pulong ug ma-angkon ang bulawanong pagdayag sa Dios diha kang JESUKRISTO nga mao ang KAMATUORAN nga sa dugay na nga panahon gitagu-an, apan karun gibutyag na pina-agi sa iyang Bugtung Anak nga si Ginoong JesuKristo, atong basahon ang I Corinto 2:11:
“Kay kinsa bang pagkatawhana ang nasayud sa mga hunahuna sa tawo gawas sa espiritu nga anaa nianang tawhana? MAINGON MAN USAB, WALAY BISAN USA NGA MAKASABOT SA MGA HUNAHUNA SA DIOS GAWAS SA ESPIRITU SA DIO.”
Tataw dinhi sa sinulat apostol Pablo ngadto sa mga taga-Korinto, nga ang buntong anaay kapasasidad sa pagsabot sa Dios mao lamang ang Espiritu sa Dios. Ang huna-huna nga tawhanon wala gayud kapasidad sa pagsabot sa mga butang sa Dios. Bisan paman igsoon kon ikaw nakabaton sa pinaka-taas nga kina-adman sa tawo, kawang lamang kini kon wala ang pagsabot nga nagikan sa Huna-huna sa Dios nga ma-anaa sa Iyang Espiritu. Sa pinulongan nga Inglis kini gitiwag ug “Divine Wisdom” o “Heavenly Knowledge” o ka-alam nga balaan ug nagikan sa Dios.
Dili ba makita nato sa katilingban nga daghan nga mga tawo nga tag-as ug ka-alam nga tawhanon ug taas nga edukasyon, apan sa kinabuhi kawang ug daghang sipyat ang mga desisyon. Daghan ang datu sa tawhanong bahandi apan kawang sa kalinaw ug kalipay sa kinabuhi. Daghan usab ang kawang sa tawhanong bahandi apan datu sa kalinaw ug kalipay. Anaa usab pipila nga haruhay sa tawhanong pagkabutang ug malinawon ug malipayon usab uban ang iyang mga minahal sa kinabuhi.
Ang kalibug sa tawo sa mga butang espirituhanon nagagikan igsoon sa iyang SALABOTAN nga wala pa ma-abli sa kamatuoran sa iyang PAGKA-USA sa Espiritu sa Dios. Tungod sa iyang estado nga daw nahikatulog sa kamatuoran nga Espiritu lamang sa Dios ang makasabot sa mga butang sa Dios, ang tawo nga anaa sa iyang tawhanong panghunahuna naningkamot sa pagsabot sa mga butang sa Dios pina-agi sa iyang natural or karnal nga panghunahuna. Kawang lamang kini.
Ang Balaang Kasulatan diha sa 1 Corinto 2:11, nagahatag kanato sa dili gayud malalis nga KAMATUORAN nga: Walay makasabut sa huna-huna sa Dios, gawas lamang sa Espiritu sa Dios.
Igsoon, mahimo nga ikaw ug ako nakabaton ug taas nga kina-adman sa koliheyo ug naghupot ug inila ug dunganon nga mga titulo sa katilingban, apan, bisan paman sa pinaka lantip nga huna-huna sa tawo, kon kini wala mahiusa diha sa Espiritu sa Dios, diin kini nahimo nga USA sa HUNA-HUNA NI KRISTO, busa igsoon ikaw ug ako dili ug dili gayud makasabot sa huna-huna sa Dios.
Mao kini ang kamatuoran! Nga ang HUNA-HUNA lamang sa Espiritu sa Dios ang adunay BUGTONG KAPASIDAD sa pagsabot sa HUNA-HUNA sa Dios. Dili titulo igsoon, dili diploma, dili kina-adman, katigayunan o unsa paman nga mga tawhanong butang ang gikinahanglan arun kita makasabot ug maka-ambit sa mga pagpadayag nga espirituhanon. Kon dili, USA lamang, ug mao kini ang atong kinatibuk-ang PAGKA-HIUSA diha sa Espiritu sa Dios, diin ang Huna-huna sa Espiritu mao na ang nagapanglihok isip atong huna-huna.
Si Ginoong Jesus samtang nagatudlo sa mga katawhan nagaingon sa Matthew 5:6,8: Malipayon sila nga mga POBRE sa espiritu kay kanila ko gihatag ang Gingharian sa Dios. Malipayon sila nga adunay putli nga kasing-kasing kay sila makakita sa Dios.
Ang pagka-pobre diha sa Espiritu igsoon, nagpasabot sa atong tinuoray nga pagpakig-hiusa sa Dios, diin tungod niini, atong gibiyaan ang mga butang kalibutanon arun atong makaplagan ang mga butang espirituhanon. Ang pagpangita sa Gingharian sa Dios, mao ang pag biya sa atong mga tawhanong panghuna-huna, pangandoy, paningkamot ug damgo sa kinabuhi ug pagpasig-uli sa atong relasyon sa Dios diin atong mabatunan ang atong PAGKA-USA kaniya diin mahiusa na usab Kaniya ang atong Huna-huna, pangandoy, paningkamot ug damgo sa kinabuhi.
Niii nga kamatuoran igsoon, patas kitang tanan, Ang adunay kina-adman ug ang walay grado, ang pobre ug datu sa katilingban, kay ang sukdanan sa mga butang espirituhaon dili man ang mga butang kalibutanon apan ang ESPIRITU sa Dios lamang usab.
Siguro makaingon ka igsoon: Pagkalisud diay nga masabtan ang mga butang sa Dios! Dili igsoon….lisod lamang kini alang kanila nga datu sa mga butang kalibutanon apan kini sayon lamang alang kanila nga tinuoray nitaliwan gikan sa kalibutan sa tawo arun mangita sa Gingharian sa Dios.
Atong hinumduman nga ang Espiritu sa Dios ma-ania na sa matag usa kanato. Ug si kinsa man kanato ang adunay kakugi, tinuoray nga nagahatag sa iyang kinabuhi nga siya MAHIUSA sa huna-huna sa Dios, siya makadawat sa grasya nga makasabot sa mga butang sa Dios.
Ang kakulang ug dili pagkasabot sa mga butang sa Dios, gi larawan kini sa Bibliya nga “KANGIT-NGIT”. Kay diha sa kangit-ngit wala man kita’y makita. Sa sama nga pa-agi, kon ang huna-huna sa tawo anaa sa kangit-ngit, dili niya masabtan ang mga butang sa Dios.
Mao kini ang gipadayag sa panahon ni Moises, diin ang arko sa Kobenante sa Saad sa Dios (The Ark of the Covenant), gi tabonan sa usa ka baga nga tabil “VIEL” o kurtina, nga maoy ni ulang sa Balaang Dapit gikan sa Pinakabalaan nga Dapit sa Tabernakulo. Mao usab ang huna-huna o salabotan sa tawo nga anaa sa kangit-ngit sa walay pagkasabot sa kamaturon sa mga pinadayag sa Dios, daw kini natabunan usab sa usa ka baga nga kurtina, nga dili niya makita o masabtan ang Dios, bisan pa man kon ang Dios anaa na nagpuyo kaniya.
Sa panahon ni Moises usa lang ang makasulod sa sa Pinaka-balaang Dapit, ug siya mao ang Pinaka-taas nga Pari o “High Priest“. Ang High Priest lamang ang makadungog sa Dios ug makasaksi sa panganod sa himaya sa Labaw nga Makagagahum. Ang High Priest lamang ang makahimo sa tinuig nga sakripisyo pagpapas sa sala sa tibuok katawhan pina-agi sa pag-ula sa dugo diha sulod sa altar sa Pinakabalaang Dapit. Ang ang High Priest gikinahanglan nga magkinabuhi sa balaanong katarung, tungod kay kon dunay sala kaniya, siya mamatay sulod sa Pinakabalaang Dapit.
Ang High Priest sa panahon ni Moises mao ang simbolo ni Jesukristo, sa Iyang pagkahiusa diha sa Dios Amahan siya mi diklarar nga “AKO UG ANG AKONG AMAHAN USA RA.” (John 4:24)
Sa Iyang pagkahiusa sa Dios, siya ang High Priest, dili sa kaliwat ni Aaron nga mga tawhanon nga pari, apan sa kaliwat ni Melchizedick (Hebrews 5:6-10), nga walay gigikanan ug walay ginikanan, dili pa nagpasabot kini sa Espiritu sa Dios. Isip Espirituhanong Pari nga nahiusa sa Dios, si Kristo nagahimo sa iyang kaugalingon isip buhi nga HALAD bugti sa kapasaylo-an sa tanang katawhan sa kalibutan. Ug human niini, diha Kaniya nadayag ang himaya sa Dios. Busa, igsoon, gawas lamang kon kita mahiusa kang Kristo, nga nahiusa sa Dios, dili ug dili gayud nato madawat ug masabot ang mga butang espirituhanon.
Sama sa mga pari nga kutob lamang sila sa Balaan nga Dapit nga nagapamuhat sa mga butang sa Dios. Tinuod matinud-anon sila sa ilang tahas, apan dili ug dili gayud sila makakita sa pagkunsad sa himaya sa Dios nga anaa lamang sa Pinabalaang Dapit diin ang High Priest lamang ang maka-saksi.
Daghan kanato ang kontento lamang sa mga bulohaton sa mga pari sa Balaang Dapit. Matinud-anon kita sa tahas nga gisangon kanato sa atong mga labaw sa atong pundok o relehiyon. Igsoon kon ikaw o ako buot nga mo saksi sa pagkunsad sa himaya sa Dios, gikinahanglan nga atong malatas ang baga nga tabil “VEIL” o kurtina gikan sa Balaang Dapit ngadto sa Pinakabalaang Dapit. Ug mao kini ang atong pag-taliwan sa tanang butang kalibutanon o tawhanon, sa walay na gayud pagbalik pa, padulong ngadto sa atong pakig-hiusa ka Ginoong Jesukristo.
Diha sa atong pagtaliwan sa atong pagkatawhonon, mao ang atong kamatayon sa unod o karnal nga kinabuhi. Ug diha sa atong kamatayon, nahiusa kita sa kamatayon ni Jesukristo didto sa Krus sa Kalbaryo, diin kini gi-isip nga mao ang atong BAPTISM (Romans 6:3-10), o bawtismo sa espiritu ug diha MAPIKAS ang baga nga tabil o “VEIL” padulong ngadto sa Pinakabalaang Dapit.
Ug sa diha nga nahiusa na kita kang Ginoong Jesus diha sa Iyang Kamatayon, pina-agi asa atong kaugalingon nga kamatayon gikan sa karnal nga pagkinabuhi, kita nahiusa na usab Kaniya sa iyang pagka High Priest, nga maoy magahatag kanato ka kahigayonan sa pagsulod kauban niya didto sa Most Holy Place o Pinakabalaang Dapit, diin ato na nga masaksihan ang pagkunsad sa Mahimayaong Panganud sa Presensya sa Dios. Mao kini ang atong pakahiusa kaniya sa iyang Pagkabanhaw gikan sa kamatayon.
Ang tawo nga anaa pa ang kangit-ngit sa iyang SALABOTAN, dili gayud makasabot sa mga butang espirituhanon ug nagkinahanglan siya sa kahayag sa kinabuhi sa Dios, diha sa iyang SALABOTAN o “consciousness”.
Kini nga kahayag mo-abot lamang sa diha nga kita maka-amgo na sa atong pagkahiusa diha ni Kristo nga nahiusa diha sa Dios. Ug kini nga kahayag dili sa dali dali lamang makab-ot sa tawo. Nagkinahanglan kini ug makanunayon nga pagpangita sa Dios sa sayong kabuntagon hangtud na sa ato na usab nga pagkatulog sa kagabhi-on. Tungod kay kita na anad na nga magkinabuhi nga tawhanon, gikinahanglan nga ato na usab pagatud-loan ang atong kaugalingon sa pagkinabuhi nga NAHIUSA diha sa Dios, ug kini manukad sa atong paila Kaniya.
Ang atong pag-ila sa Dios, manukad usab sa atong pag-basa sa iyang Balaang mga Pulong ang pagdala niini ngadto sa atong mga pagpamalandung diin ang Balaang Espiritu sa Dios manudlo ug makigsulti kanato sa pagpasabot sa mao nga nga pulong. Makatabang usab ang atong pagpaminaw ug nga wali kabahin sa Gingharian sa Dios ug ang pakig-fellowship sa mga kaigsoonan nga sama kanato nga naglakaw sa ilang PAKIG-HIUSA sa Dios diha sa ilang kinabuhi.
Sa diha nga malamdagan ang atong huna-huna sa atong PAGKAUSA diha sa Dios, kini MA-ABLI ngadto sa himaya ug presensya sa Dios, ug ang mga pagpadayag sa kinatibuk-an sa iyang saad kanato nga Iyang mga anak.
Apan kon ang tabil o kurtina sa kangit-ngit sa huna-huna sa tawo nagpabilin pa sa pagtabon sa iyang salabotan, dili niya masabtan ang Dios ug dili niya masinati ang kinabuhi sulod sa Gingharian sa Dios diin siya usa na sa iyang Magbubuhat ug Labaw nga Makagagahum.
Ang salabotan o huna-huna sa tao nga wala malamdagi sa kahayag sa huna-huna sa Dios, kabos sa pagsabot sa mga butang sa Dios, ug dili kini maka-ambit sa langit-nong kaalam, kay kini tawhanon, ug mga butang lamang nga tawhanon usab ang iyang masabtan, kini anaa sa estado nga NAHIKATULOG ug sama sa NAGDAMGO lamang diin daghan nga mga huna-huna magamugna nga wala gayud kamatuoran ug mga ideya, systema o uban pa nga mga butang nga wala nagagikan diha sa Dios.
Dinhi mitumaw ang nakalain-lain nga mga doktrina sa nagkalain-lain nga mga pundok. Matag relihiyon, adunay ilang ngakalain-lain nga mga imahinasyon sa nawong sa ilang Dios. Tima-ilhan lamang kini nga wala sila mahiusa sa Dios. Tungod kay ang Dios ESPIRITU man, (Juan 4:24), dli makita sa tawhanong mga mata, ug dili madungog sa tawhanong dalunggan, apan ang mga nagkalin-lain nga mga reliheyon ug denominasyon, nagkaiya-iya ang imahe ug nawong sa ilang mga Dios ug doktrina nga gituhu-an. Ug diha sa ilang pagkabahin-bahin sila kanunay nag-away tima-ilahn nga wala sa ilang taliwala ang Dios, kay Siya Dios man sa kalinaw, ug ang KALINAW pondasyon sa Iyang Gingharian.
Diha sa kangit-ngit sa SALABOTAN sa tawo, namugna ang mga problema ug kakapoy sa kinabuhi, depresyon, kasakit, sakit, kagubot, panag-away away, panag-bingkil ug walay pagsinabtanay, ug uban pa nga mga kabug-aton ug sakit o kasakit sa kinabuhi sa tawo. Kon atong balikon pag-basa ang Genesis 1, diin gibuhat sa Dios ang kalibutan ug ang tanan nga naa sulod niini, ang nakita lamang sa Dios maayo. Gani gipanalanginan sa Dios ang tibuok kabuhatan kay kini tanan maayo man ug siya nipahulay sa ika-pito nga adlaw.
Igsoon, dili nato mabasa nga gi apil sa Dios pagbuhat ang sakit, sama sa high blood pressure, diabetes, arthritis, dengue, ug uban pa. Wala kini niya buhata sa sinugdan pa, busa kita makapangutana gayud kinsa man diay nagbuhat niini. Ang labing seguradong tubag mao nga ang DILI ANG DIOS NAGBUHAT NIINI!
Tungod sa kakulang sa kaalam nga gikan gayud sa Ginoo, ang kangit-ngit sa salabotan sa huna-huna sa tawo kanunay nga libog o malibog ug nagahimo ug lain lain lang nga mga interpretasyon sa nahasulat sa Balaang Kasulatan. Sama sa Genesis 1:26-27, nga bisan kon tataw kaayo ang nasulat nga ang tawo gihimo sumala sa imahe sa Dios, apan lagi, kay ngit-ngit man ang salabutan sa tawo nga wala mahi-usa diha sa Dios, iyang gisabot ang mao nga bersikolo nga ang Dios gibuhat sa IMAHE sa Tawo, sukwahi ug balit-ad sa gisulat sa Kasulatan nga ang Tawo gibuhat sa Image sa Dios.
Ang ngit-ngit nga salabotan sa tawo, nagatuo nga ang Dios sama sa tawo, mao nga kon imo nga pangutan-on kon unsa ang nawong sa Dios, ang una nga mo-santop sa iyang huna-huna mao ang imahe o nawong sa usa ka tawo, ug iya dayon isipon o sabton nga ang nawong sa Dios sama sa nawong sa tawo, apan ang Dios dili tawo, anaa siya sa tawo, apan dili siya tawo.
Mao kini ang kamatu-oran……….ang Dios DILI tawo!
Mao nga kon ato Siya nga ilhon, tan-awon o sabton, pina-agi sa atong tawhanong pag-panabot, huna-huna o ideya, kawang lamang ang tanan, dili ug dili gyud masabtan sa huna-huna sa tawo ang Dios tungod kay ang huna-huna sa tawo, walay kapasidad sa pagsabot sa mga butang langit-non ug iya sa Dios. Ang kaalam sa tawhanong pagpanabot taphaw lamang ug walay kamatuouran diha sa Ginoo.
Pasumbingay: Igsoon, ablihi ang imong kasing-kasing ug huna-huna sa lamdag sa Balaang Espiritu, aron imong masabtan ug makuha ang mensahe ni-ining imong gibasa karon. Dili pagtulon-an lamang ang imong gibasa karon, apan aduna kiniy kinabuhi ug kamatuoran nga andam ug tagana ang Dios nga ipa-ambit ngadto kanila nga gi-uhaw ug nangita Kaniya. Ikaw ba nangita Kaniya ug gi-uhaw sa Iyang mga buhi ug presko nga pagpadayag? Kon ikaw gi-uhaw ug nangita… ikaw pagatagbawon Niya sa tubig sa kinabuhi nga wala nay pagkahubas, ug Siya imong makaplagan kon ikaw nangita Kaniya…
Niini nga kamatuoran kita manukad sa atong pagtuki sa kamatuoran usab nga gipadayag sa Dios sa Genesis 1:26-27.
Dinhi, makapangutana kita, unsa man gayud diay ang gipasabot sa nahisulat sa Genesis 1:26-27, nga KITA gimugna sama ug sigo gayud sa imahe ug bayhon sa Dios?
Ang grasya sa Dios Amahan, naga-uban kanato kanunay.
– Pagasumpayan Pa –
October 5, 2016 (Bogo City, Cebu Philippines)
Leave a Reply